Akamaro ko kunywa amazi arimo ubuki

Akamaro ko kunywa amazi arimo ubuki

Amazi arimo ubuki ni meza kandi ni ingenzi ku buzima. Uretse kuba kuyategura byoroshye ndetse bikaba bitanahenze, ni n’ikinyobwa gifasha ingeri zose.

Aya mazi uyanywa mu gitondo ukibyuka nta kindi uranywa cyangwa ukayanywa mbere yo kurya nkuko wanayanywa ugiye kuryama. Nkuko izina ribivuga ni amazi uba wavanze n’ubuki, nkuko turi bubibone hepfo uko ategurwa.

 

Reka turebe akamaro ku buzima

 

1. Kugabanya ubwivumbure

 

Ubuki bufasha umubiri kurwanya no guhangana n’ubwivumbure kuko bwongerera ingufu ubudahangarwa bw’umubiri. Ibi bikanarinda kubyimbirwa cyane cyane ababyimbirwa cyane nk’iyo akantu kabarumye cyangwa kabasharuye.

 

2. Gutakaza ibiro

 

Kunywa aya mazi bituma wumva uhaze bityo bikakurinda kurya byinshi cyangwa kuza kugira akantu urya hagati y’amafunguro. Iki kinyobwa kandi gifasha umubiri mu mikorere yawo bityo bigatuma utwika ibinure vuba, bigafasha kugabanya ibiro.

Niba wifuza gutakaza ibiro aya mazi ni ingenzi

3. Kongerera ingufu ubudahangarwa

 

Mu buki dusangamo H2O2 (hydrogen peroxide) ikaba izwiho kurwanya mikorobi. Si ibyo gusa kuko bunabamo vitamin C iyi ikaba ingenzi mu kongerera ingufu ubudahangarwa aho ituma hakorwa insoro zera nyinshi (ari zo zitwa abasirikari b’umubiri) zishinzwe guhangana na za mikorobi zinjiye mu mubiri.

 

4. Kurinda ubuhumekero

 

Benshi bakoresha aya mazi mu kuvura indwara zifata mu buhumekero harimo ibicurane, inkorora, gufungana amazuru no kokera mu muhogo. Ibi biterwa na kwa kuba bukize kuri vitamin C no kuba iki kinyobwa kiba gishyushyemo. Niba rero wumva hatangiye kuza ibimenyetso bya gripe, fatirana hakiri kare winywere aya mazi arimo ubuki bizagufasha.

 

5. Gufasha mu igogorwa

 

Ubuki bufasha mu kubyimbura kandi bugafasha mu mikorere y’igifu. Niba wagize agasesemi, kugugara, gutumba inda, ibyuka mu nda gufata aya mazi arimo ubuki bizagufasha kandi binafasha mu gutuma umubiri ukamura intungamubiri mu byo wariye.

Aya mazi ategurwa ate?

Nkuko biboneka icyo usabwa ni amazi n’ubuki gusa ushobora no kongeramo indimu kugirango wongere icyanga n’ingufu za vitamin C.

Uteka amazi yamara kubira ukayasuka mu gikombe cyangwa ikindi ushaka kuvangiramo, ukarindira iminota byibuze itatu (ku buryo amazi aba atagishyushye byo gutwikana ku buryo byakangiza vitamin C) noneho ukavangamo ubuki.

Niba ushaka gushyiramo n’indimu uyikamuriramo ukavanga ukanywa.

 

Icyitonderwa

 

Usabwa gukoresha ubuki buringaniye kuko gukoresha bwinshi byateza izindi ngorane. Mu gikombe cy’amazi ushyiramo ibiyiko bitarenze bibiri binini.

 

Zimwe mu ngorane zazanwa no gukoresha ubuki bwinshi harimo kuzamuka kw’isukari yo mu maraso, kongera ibiro aho kubigabanya, kuba wakangirika amenyo kubera amasukari aba mu buki, gusa ibi byo kubyirinda ni ukwibuka koza amenyo nyuma yo gukoresha iki kinyobwa.

 

Ahasigaye navuga ngo muryoherwe kandi mugire ubuzima bwiza

Akamaro ka melanin mu mubiri

Akamaro ka melanin mu mubiri

Akenshi iyo havuzwe melanin duhita twumva abirabura, kandi koko niko bimeze kuko uyu musemburo ushinzwe ibara ry’uruhu uba mwinshi ku bafite uruhu rwirabura bakaba banatuye ahaba izuba ryinshi. Icyakora n’abatirabura barayigira gusa ku gipimo cyo hasi cyane dore ko ubwinshi bwa melanin bufite byinshi burinda kandi iyi melanin uretse gutuma uruhu rwirabura inafite byinshi imariye abayifite. Kuvuka ntayo ufite ni cya gihe uvuka uri nyamweru

 

Akamaro kayo mu buzima bwacu

 

Ni ingenzi ku bwonko, n’ibindi bice by’umubiri imbere

 

Nibyo koko melanin niyo ituma tugira uruhu n’imisatsi byirabura ariko burya siho honyine tuyisanga. Hafi ya buri karemangingo k’umubiri usangamo melanin by’umwihariko ku bwonko n’imyakura ngo bikore neza, ku maso ngo abone neza (imboni yayo) ndetse no mu turemangingofatizo ngo tubashe kwiyongera.

Ifasha gushwanyaguza ibibyara uburozi

Uko umubiri ukora hagenda haboneka ibisigazwa kandi uko byibika muri wo bibyara uburozi bwangiza bimwe mu bice by’umubiri harimo n’uruhu. Melanin rero ifasha umubiri kwangiza ibyo byakabyaye uburozi nuko ikarinda ingaruka zari guterwa na bwo cyane cyane ku ruhu.

Kurinda imirasire mibi y’izuba.

Ni ingenzi ko abatuye ahaba izuba ryinshi birabura cyane kuko bibafasha guhangana n’imirasire y’izuba yo mu bwoko bwa UV (ultra violet) izwi ho kwangiza uruhu no kuba yatera kanseri y’uruhu.

Ituma uruhu rudasaza vuba

Kujya ku zuba kenshi byangiza uruhu bigatuma rusaza rukanazana iminkanyari ariko kandi ku bafite uruhu rwirabura siko bigenda kuko biratinda. Niyo mpamvu uzasanga umuntu munganya imyaka ariko w’uruhu rwera agaragaza gusaza ku ruhu no kuzana iminkanyari kurenza wowe kuko melanin yawe iba yakoze akazi ishinzwe ko kurinda uruhu.

 

Ifasha mu myororokere

 

Aha wenda wabyumvamo amakabyankuru ariko si ugukabya. Melanin irinda ko DNA yakangirika, igatuma umubiri winjiza UV ikenewe gusa kandi ikarinda kwangirika kwa vitamin B9 (folic acid). Iyi vitamin ni ingenzi ku mugore utwite kuko irinda umwana we kuba yazavukana ubusembwa cyangwa ubumuga. Niyo mpamvu abafite uruhu rutirabura batuye mu bice byegereye koma y’isi aho izuba riba ryinshi baba bafite ibyago byinshi byo kubyara abana bafite ubusembwa n’ubumuga.

 

Dusoza

 

Si ibi gusa byiza bya melanin ahubwo twaguhitiyemo iby’ingenzi. Nyamara se ni bangahe bamaze kwiyangiriza uruhu bitukuza bagahindura uruhu rwabo? Ibi byiza tubonye kuri bo byamaze kugabanyuka kandi amwe mu mavuta cyane cyane ayarimo hydroquinone, n’andi yitwa ko acyesha uruhu ni bimwe mu byangiza melanin yawe.

INAMA ISUMBA IZINDI NI UKURINDA UBUSUGIRE BWA MELANIN YAWE KUKO NTIWAYIHEREWE UBUSA